نيب سموريون قانوني گهرجون پوريون ڪندي ڪرپشن ريفرنسز ۾ عمران خان جي گرفتاري ڪئي آهي، عمران خان ملڪ دشمن قوتن سان گڏجي پاڪستان جي ادارن کي نقصان پهچائڻ پويان آهي: وفاقي وزير راڻا ثناءُ الله خان

اسلام آباد-09 مئي (اي پي پي)گهرو معاملن واري وفاقي وزير راڻا ثناءُ الله خان عمران خان جي القادر ٽرسٽ ۽ توشا خانه ڪيس ۾ گرفتاري جي تصديق ڪندي چيو آهي ته قومي احتساب بيورو سموريون قانوني گهرجون پوريون ڪندي ڪرپشن ريفرنسز ۾ عمران خان جي گرفتاري ڪئي آهي، عمران خان کي مرضي جي خوراڪ پهچائڻ بدران کيس ڪنهن بحالي مرڪز ۾ رکڻ گهرجي ته جئين سندس علاج به ٿي سگهي، عمران خان هن وقت ملڪ دشمن قوتن سان گڏجي پاڪستان جي ادارن کي نقصان پهچائڻ جي پويان آهي، عمران خان کان سواءِ سندس پارٽي جا ماڻهو به اهڙين حرڪتن ۽ ڪاررواين ۾ ملوث آهن جيڪي ملڪ دشمني جي زمري ۾ اچن ٿيون، پاڪستان جي ادارن ۽ ايجنسين خلاف عمران خان جو بيان به فرمائشي بيان آهي. هو پي ٽي وي هيڊڪوارٽر ۾ پريس ڪانفرنس کي خطاب ڪري رهيو هو. گهرو وزير راڻا ثناءُ الله خان چيو ته عمران خان نيازي کي اڄ نيب گرفتار ڪيو آهي، ائين ته ان جي خلاف درجنين ڪيس آهن جنهن ۾ ڪرپشن انڪوائريون هلي رهيون آهن پر اها گرفتاري القادر ٽرسٽ جي نالي سان ڪيس ۾ انڪوائري کانپوءِ ڪئي وئي آهي، هڪ پراپرٽي ٽائيڪون جي رقم برطانيه ۾ پڪڙي وئي، 190 ملين پائونڊ جيڪا 60 ارب روپيا بڻجي ٿي، قانون موجب هي پاڪستان جي عوام جي امانت هئي ۽ قومي خزاني ۾ واپس اچڻي هئي، برطانوي حڪومت پاڪستاني حڪومت سان رابطو ڪيو ۽ رقم واپسي انتظامن بابت ڳالهه ڪئي، عمران خان جو ساٿي شهزاد اڪبر وچ ۾ آيو ۽ سوديبازي ڪئي جنهن جي نتيجي ۾ القادر ٽرسٽ بڻائي وئي ان ٽرسٽ جي نالي تي 458 ڪينال اتي ۽ 240 ڪينال جڳهه بني گالا ۾ القادر جي نالي تي منتقل ٿي. ان اسڪينڊل کي مون ئي بي نقاب ڪيو هو ۽ چئلينج ڪيو هو ته هي ڪرپشن جو وڏو اسڪينڊل آهي پر عمران خان ڪو به جواب نه ڏنو. هن چيو ته 7 ارب جي پراپرٽي ۾ 2 ارب شهزاد اڪبر وٺي 190 ملين پائونڊ سپريم ڪورٽ جي اڪائونٽ ۾ ايڊجسٽ ڪرائيندي رقم انهي پراپرٽي ٽائيڪون کي واپس ڏني وئي. هن چيو ته جيڪا رقم ٻاهرين ملڪ کان اسان جي اڪائونٽ ۾ اچي رهي آهي اها ڪٿان کان اچي رهي آهي ان تي سپريم ڪورٽ به نوٽيس ناهي ورتو. هن چيو ته اڄ به پي ٽي آءِ جي سمورن ليڊرن کي چئلينج ڪريان ٿو ته القادر ٽرسٽ جا ٽرسٽي ڪير آهن ۽ 7 ارب جي پراپرٽي خريداري جي مني ٽريل ئي ناهي، جيڪڏهن پي ٽي آءِ وٽ آهي ته سامهون کڻي اچي. هن چيو ته جڏهن عمران خان ڪرپشن ڪري رهيو هو ته انهي وقت ئي هو پنهنجي مخالفن جي خلاف ڪرپشن جا ڪوڙا ڪيس ٺاهي رهيو هو، هن شخص جي مڪاري ڏسو ته ماڻهن کي چور چور، ڌاڙيل، ڌاڙيل جا نعرا لڳائيندي پاڻ اهڙي قسم جي گهٽيا ڪرپشن ڪري رهيو هو. گهرو وزير راڻا ثناءُ الله خان چيو ته القادر ٽرسٽ جون رجسٽريون، منتقلي موجود آهي، هڪ پئسو ادا ناهي ڪيو ويو، اسان کي ان ڳالهه جو افسوس آهي ته چوري جو پئسو جڏهن سپريم ڪورٽ جي اڪائونٽ ۾ ايڊجسٽ ٿي رهيو هو ته ڪاش ڪير پڇي وٺي ها ته پئسو ڇو ايڊجسٽ ٿي رهيو آهي. هن چيو ته عمران خان گرفتاري جي موقعي تي مزاحمت ڪئي آهي، وڪيلن کي زيب نٿو ڏي ته هو ڪنهن پارٽي جي شخص جي گرفتاري ۾ رڪاوٽ بڻجن. هن چيو ته توشاخانه ڪيس به ثابت ٿيل آهي، ان ۾ جعلي رسيدون لڳايون ويون، هي ڪرپشن به عين انهي وقت عمران خان ڪري رهيو هو جڏهن نواز شريف تي ڪيس ٺاهيا پئي ويا، مريم نواز، شهباز شريف ۽ شريف فيملي جي ٻين ماڻهن خلاف ڪيس ٺاهيا پئي ويا، هن چيو ته عمران خان توشاخانه مان تحفا چوري ڪيا، جعلسازي سان ٻاهرن ملڪ کڻي وڃي وڪرو ڪيا ويا، اهي شيون جاچ عمل ۾ ثابت آهن، جنهن دڪان جي جعلي رسيد ٺهي هئي ان جي حقيقت به سامهون اچي چڪي آهي. ڪرپشن جا ڪيسز نيب وٽ آهن. هن چيو ته فرح گوگي 12 ارب روپيا بئنڪنگ چئنل ذريعي ٻاهرين ملڪ منتقل ڪيا آهن، هو وزيراعظم هائوس رڪارڊ ۾ فيملي ميمبر هئي، اتي اچڻ وڃڻ ۾ ڪا به رڪاوٽ ناهي. هن چيو ته نيب کيس نوٽيس ڪيو ۽ جاچ ۾ شامل ٿيڻ جو چيو، انهن ريفرنسز جا سمورا ثبوت موجود آهن، پيش ٿي الزامن جو جواب ڏيڻ ضروري هو پر هو عدالت ۾ پيش نه ٿيو، نوٽيسز هاءِ ڪورٽ ۾ چئلينج ٿيا جنهن کانپوءِ قانون موجب ڪارروائي جي حڪم کانپوءِ نيب عمران خان جي گرفتاري عمل ۾ آندي آهي. هن چيو ته عمران خان جي حڪومتي دور ۾ مخالفن جي گرفتارين جو وقت کان اڳ اعلان ڪيا ويندا هئا. گهرو وزير چيو ته عمران خان جي گرفتاري قانون موجب ٿي آهي، نيب هڪ خودمختيار ادارو آهي، حڪومت جو ڪنهن قسم جو ڪنٽرول ناهي، گهرو وزير طور قسم کڻي چئي سگهان ٿو ته نيب آفيسر يا نيب چيئرمين سان منهنجي ڪڏهن ملاقات ناهي ٿي ۽ نه ئي مون ڪا بريفنگ ورتي آهي. هڪ سوال جي جواب ۾ هن چيو ته انتقامي ڪارروائي جونشانو ناهي بڻايو ويو، القادر ٽرسٽ جي نالي تي 7 ارب روپين جي جائيداد عمران خان ۽ سندس گهرواريءَ جي نالي تي آهي پوءِ انتقامي ڪارروائي ڪيئن آهي. هي هڪ ڪرپشن آهي جنهن جا دستاويزي ثبوت موجود آهن، هن چيو ته اها ڳالهه سراسر غلط آهي ته ڪنهن کي عمران خان جي گرفتاري تي تشدد جو بڻايو ويو آهي، گرفتاري جي موقعي تي عمران خان جي ذاتي سيڪيورٽي ڪجهه مزاحمت ڪئي آهي. هڪ سوال جي جواب ۾ هن چيو ته شهزاد اڪبر ان معاملي ۾ 2 ارب روپيا ورتا آهن ان کي به پاڪستان آڻڻ گهرجي، جيڪڏهن نيب ان حوالي سان ڪجهه ڪيو ته گهرو وزارت ان حوالي سان پنهنجون ذميواريون پوريون ڪندي. هن چيو ته سمورن صوبن جي چيف سيڪريٽرين ۽ آءِ جيز کي چيو ويو آهي ته عمران خان جي گرفتاري کانپوءِ ڪنهن به قسم جي امن امان جي صورتحال پيدا ڪرڻ جي ڪوشش ڪن ته سختي سان منهن ڏنو وڃي. جنهن اورانگهڻ جي ڪوشش ڪئي ته قانون حرڪت ۾ ايندو. هن چيو ته اسلام آباد ۾ رينجرز مستقل بنيادن تي مقرر آهي، اڄ جڏهن نيب مدد چاهي ته پاڻ سان گڏ اسلام آباد پوليس رينجرز جيڪا ريڊ زون ۽ هاءِ ڪورٽ عمارت جي چوڌاري مقرر هوندي آهي جي مدد سان گرفتاري عمل ۾ آندي آهي. گهرو وزير راڻا ثناءُ الله خان چيو ته گرفتاري وارنٽ ڏيکارڻ کاپوءِ به عمران خان گرفتاري کان انڪاري هو. هن چيو ته ملڪ ۾ ته سياسي روايتون هيون، اسان جڏهن پنهنجي سياسي زندگي جو آغاز ڪيو ته پنهنجي پارٽي ته ڇا ٻين پارٽين جي اڳواڻن جو به احترام ڪيو هو، سياست ۾ بدتميزي جو خالق عمران خان آهي . هن چيو ته 60 ارب جو ثابت ٿيل ڌاڙو تڏهن لڳو جڏهن عمران خان وزيراعظم هو، ان ۾ بينيفيشل پراپرٽي ٽائيڪون ضرور آهي پر ان ڏوهه جو مرڪزي ڪردار عمران خان پاڻ آهي. هن چيو ته عمران خان فراڊ ڪيو هو، وهيل چيئر جي ان کي ضرورت ئي نه آهي، جيڪڏهن ڀڄي وڃڻ ۾ ڪامياب ٿيڻ جي اميد هجي ها ته هو ضرور ڀڄي چڪو هجي ها. هڪ سوال جي جواب ۾ هن الزام هڻندي چيو ته عمران خان هن وقت ملڪ دشمن قوتن سان گڏجي پاڪستان جي ادارن کي نقصان پهچائڻ جي پويان آهي، پاڪستان جي ادارن ۽ ايجنسين خلاف عمران خان جو بيان فرمائشي آهي، ان مهم جوئي جي پويان ڪهڙيون ڪهڙيون پرڏيهي قوتون آهن جيڪي ان کان ان بياني جي ڪوشش ڪري رهيون آهن. هن چيو ته عمران خان چوي ٿو ته مون مٿان 2 قاتلاڻا حملا ٿيا آهن، منهنجي دعويٰ آهي ته وزيرآباد حملي ۾ جيڪو جوان پڪڙيو ويو اهو مذهبي جنوني هو، مون سميت جن جن کي عمران خان ملوث ڪري رهيو آهي اهو ڪوڙ کان سواءِ ڪجهه به ناهي. هڪ سوال جي جواب ۾ هن چيو ته اسان وٽ عمران خان جي گرفتاري کانپوءِ احتجاج جي صورتحال جي تازي ترين معلومات موجود آهي، ڪٿي 10 ماڻهو آهن ته ڪٿي 30 ماڻهو آهن، کين خبردار ڪيو ويو آهي ته هو اهڙو ڪرڻ کان پاسو ڪن ٻي صورت ۾ انهن خلاف ڪارروائي ڪئي ويندي. هن چيو ته عمران جي گرفتاري ڪٿان کان ٿي ان بابت نيب جي حڪمت عملي پنهنجي هئي، جيڪڏهن وارن گرفتاري جا وارنٽ هجن ته هر جاءِ تان گرفتاري جو اختيار هوندو آهي. هڪ سوال جي جواب ۾ هن چيو ته جيڪڏهن نيب ڪو نوٽيس جاري ڪيو هو ته عمران خان هاءِ ڪورٽ ۾ ڪهڙي شيءَ چئلينج ڪئي هئي، هاءِ ڪورٽ مان رٽ خارج ٿيڻ ٿيڻ کانپوءِ اها گرفتاري عمل ۾ آندي وئي آهي، هن چيو ته رقم سپريم ڪورٽ جي اڪائونٽ ۾ آهي، جڏهن ثابت ٿي چڪي آهي ته اها چوري جي رقم آهي ته اهو پئسو ان اڪائونٽ کان قومي خزاني ۾ واپس ڪرڻ گهرجي.

مضمون کا ماخذ : اسکریچ کارڈ لاٹری

متعلقہ مضامین