جمہوریت تے اداریاں دی مضبوطی چاہندوں، حکومت ملک کوں معاشی اوکھ توں کݙھ ڳھنسی، ہمسیاں نال امن چاہندوں، وزیر خارجہ بلاول بھٹو زرداری دا انٹرویو

اسلام آباد۔14دسمبر(اے پی پی)وزیر خارجہ بلاول بھٹو زرداری آکھیے جو پاکستان اپݨے سارے ہمسایہ نال امن چاہندے جو اساں تقسیم نئیں اتحاد دی سیاست تے یقین رکھدے ہیں، جیکر عمران خان سیاست کرݨ چاہندن تاں ہک جمہوریت پسند کردار ادا کرن۔ اے ڳالھ انہاں چینل نیوز ایشیا( سی این اے) کوں انٹرویو اچ آکھی۔ انہاں آکھیا جو پاکستان اتے بھارت دے نوجوان امن کیتے تیار ہین اتے ہک پر امن ہمسائیگی چاہندن، ساکوں پاکستان دی جمہوریت تے اعتماد اے اتے اساں ایندے تے ہی ٹردے پئے ہیں جو ادارے اتے جموہریت تکڑی تھیوے، یقین اے جو وزیر اعظم اتے انہاں دی اقتصادی ٹیم اتحادیاں دے ڳانݙھے نال ملک کوں اوکھے معاشی دور توں کݙھݨ اچ کامیاب تھی ویسی۔ ہک سوال دے ولدے اچ انہاں آکھیا جو ساݙی اپوزیشن فوج دے سیاست توں پچھو ہتݨ دی مہم نئیں چلیندی پئی، اے احتجاج کریندی پئی اے جو فوج غیر آئینی مداخلت کیوں نئیں کیتی اتے عدم اعتماد دا ووٹ کیوں نئیں روکیا، پاکستان اچ جمہوریت پسنداں کیتے اے ہک چنتے دی ڳالھ اے، جیکر عمران خان سیاست دان ٻݨݨ چاہندن تاں جمہوریت پسند کردار ادا کرن، آئی ایم ایف نال ݙیل عمران خان کیتی ہئی، عدم اعتماد توں بعد او پچھو تے تھی ڳن اتے ملک کوں ݙیوالا تھیوݨ تے آن کھڑائے، ساݙی حکومت اوکھ دے باوجود فوری فیصلے کیتن جو معاشی اصلاحات تھیون، عوام کوں سوکھ ملے ٻھل سیلاب دی صورتحال سنگینی ودھائی اے، بھل حکومت ایندے باوجود معاشی اوکھ توں نکل آسی۔ بلاول آکھیا جو دہشت گردی اتے انتہا پسندی بارے چیلنجز دا چنتا اے، ایں سانڳے ودھ اقدامات تھیندے پن تاں جو حالات ولا نا وڳڑ ونڄن۔ انہاں بھارت دے غیر قانونی مقبوضہ جموں و کشمیر اچ انسانی حقوق دی سنگین خلاف ورزیاں تے وی چنتا کیتا اتے باھرت اچ وی اقلیتاں خاص کر مسلماں تے مظالم روکݨ کتیے عالمی برادری کوں کردار ادا کرݨ تے زور ݙتے۔ وزیر خارجہ آکھیا جو ساݙا مستقبل نویں پود دے ہتھیں ہے،اساں کل کیتے چنڳائی دی سک کریندے ہیں جیڑھا اڄ توں چنڳاں ہوسی۔ انہاں آکھیا جو ہر مسلے دا ھل پارلیمنٹ اچ ہی اے، عمران خان کوں آہدوں جیکر او اپوزیشن کرݨ چاہندن تاں پارلیمنٹ اچ ولن اتے سڑکاں تے احتجاج اتے بے یقینی دی بجائے پارلیمنٹ توں سیاسی مخالفت کرن۔

مضمون کا ماخذ : سلاٹ فادر

متعلقہ مضامین